:: Dios ke te Crew

Xénese

1. Nun principio creou Deus a música e o baile.

2. Agora ben, resultaba que a música se atopaba sen forma e deserta e había escuridade sobre a superficie da profundidade das ondas; e a forza activa do baile movíase dun lado a outro sobre a superficie das rúas.

3.Deus otorgoulle a un discípulo seu o poder de mixturar os ritmos e os sons cas súas mans.

4. Entón, Deus entregoulle ó seu discípulo a Santísima Mesa, os Santos Platos e os Divinos Samples, e pasou a chamarlle San Dj.

5. E Deus procedeu a dicir: "Chegue a haber Hip Hop". Entón, chegou a haber Hip Hop.

6. Despois diso, Deus viu que o Hip Hop era bó, e efectuou Deus unha división dentro do Hip Hop.

7. Deus comezou a chamar á música Rap, pero ó baile chamouno Break. E chegou a haber Graffiti e chegou a haber Beat Box, un día primeiro.

8. E Deus pasou a dicir: "Chegue a haber unha expansión"; e houbo unha expansión. Dende o subterráneo ata a superficie, comezando polas cidades e chegando a tódolos rincóns da terra.

9. Deus estaba satisfeito, pero pasado un longo tempo, a ideoloxía do Hip Hop foi malinterpretada pola xente, facendo que un movemento creado para unir, cumplira a función contraria entre os seus membros: separalos entre si.

10. O Hip Hop estaba convertíndose nunha competición, incluso nun enfrontamento agresivo e as veces violento entre crews e entre os seus respectivos integrantes.

11. Isto fixo que a ira medrara en Deus dun xeito tal que o levou a crear unha Crew no seu nome, co obxectivo de predicar a verdadeira doctrina da súa creación.

12. Catro foron os elexidos para formar a Crew, enviados por Deus a un recóndito pobo perdido nunha lonxana terra chamada nalgún tempo Gallaecia.

13. Ó Irmán JamásPuah, ó Irmán Sokram, ó Irmán Mou e ó Irmán García foronselles entregados Os Santos Micros. Pisaron chan na terra dun pobo chamado Ordes e dende alí estenderon a palabra de Deus en forma de Rap, Graffiti, Break e Beat Box.

14. Nacera a "Dios Ke Te Crew".

Antes de nada, e digan o que digan os agnósticos, ateos e demáis infieis, hai que dicir que "Dios", existe, e existe de verdade.

Tal é a certeza que temos de que "Dios" existe, que ata ten unha "Crew", e por certo, menuda crew!.

Dios ke te Crew é un colectivo de Hip Hop, nado en Ordes, que engloba dentro de si a xente relacionada con tódalas vertentes artísticas desta cultura: graffiteiros, pinchadiscos, rapeiros, productores, breakers, deseñadores e demáis.

E este ano, no Festigal, contamos pois ca presencia da vertente Rap desta Crew, composta por dous membros destacados do coñecido grupo de rap en galego 5talegos (Sokram e Mou) xunto cos membros de Ghamberros, grupo máis nobel pero xa coñecido en Galiza pola súa boa traxectoria nestes tres últimos anos.

Da súa música cabe destacar a compenetración que conseguen estes catro mc´s ó articular a palabra de "DIOS". Rimas combativas, reinvindicativas, solidarias, reflexivas, divertidas e cargadas de estilo, sobre unhas bases impresionantes. A labor de producción que ven realizando Mou, tanto en 5talegos, Ghamberros e agora na Dios ke te Crew, é realmente salientable; na súa música conflúen tódolos estilos, dende o jazz ata a música tradicional, dende a clásica ata o reggae, pasando polo rock, o blues, o dance hall,o breakbeat e facendo unha boa parada no funk.

Poderiamos destacar deles temas como "¿Extranxeiros?", "Apagha a tele", "Noites de festa", "Os lobos" ou "Inxustizas", en fin, a DIOS KE TE CREW fai o seu debut no FESTIGAL 2003 e damosvos un consello: non perdades a oportunidade de velo seu show.